काठमाडौँ – बिन्ध्यवासिनी म्युजिक अवार्डको १६औँ संस्करण आगामी चैत २७ गते राजधानीमा आयोजना हुने भएको छ। बिन्ध्यवासिनी फाउण्डेसनले हालै नयाँ बानेश्वरस्थित इन्द्रेणी सुइट होटलमा बसेको सल्लाहकार तथा कार्यसमितिको संयुक्त बैठकमार्फत यस वर्षका विभिन्न सम्मान तथा पुरस्कार प्राप्त गर्ने व्यक्तित्वहरूको घोषणा गरेको हो।

मुक्तिनाथ विकास बैंकको प्रस्तुतिमा आयोजना हुने ‘रमपम बिन्ध्यवासिनी म्युजिक अवार्ड २०८२’ मा वरिष्ठ संगीतकार शम्भुजीत बास्कोटालाई एक लाख रुपैयाँ नगद र सम्मानपत्रसहित ‘बिन्ध्यवासिनी म्युजिक लाइफटाइम अचिभमेन्ट अवार्ड २०८२’ प्रदान गरिने भएको छ।

त्यसैगरी, गीतकार विजय शिवाकोटीलाई ५० हजार रुपैयाँ नगदसहित ‘बिन्ध्यवासिनी संगीत साधना सम्मान २०८२’ तथा पत्रकार पवन आचार्यलाई २५ हजार रुपैयाँ नगदसहित ‘बिन्ध्यवासिनी कला पत्रकारिता सम्मान २०८२’ प्रदान गरिनेछ।

नेपाली संगीत क्षेत्रका अग्रज गायक स्वर्गीय प्रेमध्वज प्रधानको स्मृतिमा स्थापित ‘प्रेमध्वज संगीत रत्न सम्मान’ यस वर्ष गायिका रचना रिमाललाई २५ हजार रुपैयाँ नगद र सम्मानपत्रसहित प्रदान गरिने भएको छ। यस्तै, लोकगायक झलकमान गन्धर्वको नाममा स्थापित ‘झलकमान लोक–संगीत सम्मान २०८२’ बाट लोकदोहोरी गायक पशुपति शर्मालाई २५ हजार रुपैयाँ नगदसहित सम्मान गरिनेछ।

बिन्ध्यवासिनी फाउण्डेसनकी अध्यक्ष लीना रेग्मीका अनुसार यस वर्षदेखि अवार्डका विधा घटाइएको छ। अब पब्लिक च्वाइस अवार्डसहित कुल ११ विधामा मात्रै पुरस्कार प्रदान गरिनेछ। साथै, प्रत्येक विधाका विजेतालाई ट्रफीसहित ५ हजार रुपैयाँ नगद प्रदान गरिने पनि उनले जानकारी दिइन्।

अवार्ड कार्यक्रम चैत २७ गते राष्ट्रिय नाचघर, जमलमा आयोजना हुने कार्यक्रमका सञ्चालक सुवास रेग्मीले जानकारी दिएका छन्।

काठमाडौं – नेपाली दर्शकवर्गका प्रिय नायक प्रवण भुसाल को अभिनय रहेको नयाँ आधुनिक गीत ‘फुलै फुलको’ आइतबार सार्वजनिक भएको छ। गायिका मेलिना राई र गायक हर्कुलेश बस्नेत को स्वरमा रहेको यो गीत बसन्त सापकोटा युट्युब च्यानल मार्फत रिलिज भएको हो।

गीतको म्यूजिक भिडियोमा नायक प्रवण भुसालसँगै पूजा कार्की ले अभिनय गरेकी छन्। भिडियोमा दुई नव जोडीको रोमान्टिक माया र सम्बन्धलाई सुन्दर ढंगले प्रस्तुत गरिएको छ। गीतको संगीत बसन्त सापकोटा द्वारा तयार गरिएको छ भने र्याप श्रृजना खत्री (‘हाउडे माया’) र बिवेक रनापेहिली ले दिएका छन्। गीतका शब्द सूर्यनारायण पेलिस, एरेन्ज पुष्कर सुनुवार, मिक्सिङ विप्लव अधिकारी, र रेकर्डिङ मेलोडी नेपाल मा गरिएको छ।

म्यूजिक भिडियोको निर्देशन चलचित्र निर्देशक दीपेश सापकोटा ले गरेका छन्। छायांकन निर्बेश बराल, मेकअप विक्रम थापा, र निर्माण उमेश श्रेष्ठ द्वारा गरिएको छ। रिलिज भएसँगै गीतले दर्शकबाट सकारात्मक प्रतिक्रिया प्राप्त गर्न थालेको छ।

विशेषगरी प्रेम र रोमान्सको भावनालाई केन्द्रित गर्दै तयार गरिएको यस गीतले नेपाली आधुनिक संगीत क्षेत्रमा आफ्नो छुट्टै पहिचान बनाउन सक्ने अपेक्षा गरिएको छ।

काठमाण्डौ - चलचित्र ‘टेम्के द डेष्टिनेशन’को शुभमुहूर्त गरिएको छ । धार्मिक विधिअनुसार शुक्रबार भद्रकाली मन्दिरमा विशेष पुजा गर्दै चलचित्रको शुभसाइत गरिएको हो । चलचित्र विकास बोर्डका अध्यक्ष दिनेश डीसीले नरिवल फोडेर क्ल्याप ईन गरे सँगै शुभमुहुर्त सट लिइएको थियो ।

देवप्रसाद धिमालको निर्देशन रहने चलचित्रमा शिव श्रेष्ठ, श्रीदेव भट्टराई, अर्जुन थापा, प्रितिका शर्मा, कृष्णप्रसाद धिताल, रिना गुरुङ, सरु कार्की, गोकुल सुवेदी, सावित्रा चिलवाल, सृजना बुढा, अभिषेक फुयाल, रविना दुलाल, विवेक खड्कालगायतका कलाकारहरुको अभिनय रहने छ ।

निर्माण टिमले चलचित्रको छायाँकन चैत्र दोस्रो साताबाट सुरु हुने जनाएकोे छ । काठमाडौं र भोजपुरका विभिन्न स्थानमा छायाँकन गरिने जनाइको छ ।  निर्देशक धिमाल स्वयंकै निर्माण रहने चलचित्र आर.डी.एस. नेपालको प्रस्तुतीमा बन्ने छ । चलचिका सह–निर्माता पंकज सरदार हुने भने भोला सुवेदी (प्रणप), राजनजंग थापा र जित शेरचन कार्यकारी निर्माता रहेका छन् । नरेश ऐयरको छायाँकन रहने चलचित्रमा राजु किरातको द्वन्द निर्देशन रहने छ ।

काठमाडौं – पावर ईन्टरनेशनल मिडिया नेपाल (पिम नेपाल) को प्रस्तुतिमा हरेक वर्ष आयोजना हुँदै आएको नेपालको पहिलो समावेशी म्युजिक अवार्ड अन्तर्गत ‘राष्ट्रिय समावेशी म्युजिक अवार्ड (निम अवार्ड)–२०२६’ को आवेदन आव्हान गरिएको छ ।

राष्ट्रिय समावेशी म्युजिक अवार्ड (निम अवार्ड) को यो नवौँ संस्करण हो । सभ्य, भव्य र सुसंस्कृत रूपमा आयोजना हुँदै आइरहेको निम अवार्डको समापन समारोह आगामी २०८३ साल वैशाखको तेस्रो साता काठमाडौंमा आयोजना गरिने कार्यक्रम संयोजक तथा पिम नेपालकी महासचिव कमला जोशीले जानकारी दिनुभएको छ ।

देशका विभिन्न भेगका कलाकारहरूको सहभागिता रहँदै आएको निम अवार्डमा नेपालमा बोलिने विविध भाषाभाषीका गीत–संगीतलाई विशेष प्राथमिकताका साथ समेटिँदै आएको छ । अहिलेसम्मकै बृहत् संख्यामा विभिन्न भाषाका गीतहरूको उत्साहजनक सहभागिता भएकाले यसलाई नेपालकै पहिलो समावेशी अवार्डका रूपमा लिइन्छ ।

नेपालभित्र बोलिने विभिन्न भाषा र भाकाका गीतहरूलाई कार्यक्रममा सहभागी गराउँदै आएको यस अवार्डमा काँठे भाका, देउडा भाका, नेपाल भाषा, तामाङ भाषा, मैथिली, भोजपुरी, राई, लिम्बू, थारू (चौधरी), शेर्पा, मगर, गुरुङ, सतार, सुनुवार लगायतका विभिन्न भाषाका गीत तथा भिडियोहरू सहभागी हुँदै आएका छन्। यस वर्ष पनि ती भाषा तथा भाकाका गीत–संगीतलाई अवार्ड कार्यक्रममा समेटिने आयोजक संस्थाले जनाएको छ ।

अंग्रेजी क्यालेन्डरअनुसार सन् २०२५ जनवरी १ देखि २०२५ डिसेम्बर ३० भित्र सार्वजनिक भएका (एक वर्षभित्रका) गीत तथा म्युजिक भिडियोहरू उक्त अवार्डमा सहभागी हुन योग्य हुनेछन् ।

ईरा प्रोडक्सन प्रा.लि.कोे व्यवस्थापनमा सम्पन्न हुने निम अवार्डका आवेदन फारामहरू आयोजक संस्थाको कार्यालयबाट उपलब्ध हुनेछन् । साथै एभेन्टोज डिजिटलको अनलाइन माध्यमबाट पनि फाराम भर्न सकिने व्यवस्था गरिएको छ ।

online form LINK: https://service.aventoz.com/formBooking/676ce00e2378d1735188494

गीत दर्ताका लागि आवेदनको अन्तिम मिति चैतको दोस्रो सातासम्म तोकिएको आयोजक समितिले जनाएको छ ।

काठमाण्डौं– बालबालिको नेपालकै सबभन्दा ठ्लो डान्स रियाल्टी शो नेशन्स गट ट्यालेन्ट (राष्ट्रको प्रतिभा) सिजन २ मा डोटीकी उदिप्ती रावल विजयी भएकी छन्। उनले विजेता भएवापत नगद १ लाख रुपियाँ प्राप्त गरेकी छन्। 

कार्यक्रममा ख्यातिप्राप्त हास्यव्यग्यकार, अभिनेता, गायक, संगीतकार तथा गीतकार मदनकृष्ण श्रेष्ठ र नृत्य निर्देशक वसन्त श्रेष्ठको प्रमूख आतिथ्यता एवं नृत्य निर्देशक कमल राई र नृत्य निर्देशक, फिल्म सप्पादक तथा निर्देशक राजु शाह तथा चलचित्र निर्देशक माधब राज खरेल लगायतका विशिष्ट व्यक्तित्वहरुको सहभागितामा सम्पन्न ग्रयाण्ड फिनालेमा म्याग्दीकी सुप्रिया थापा फष्ट रनर्सअप भईन्। उनले नगद ६० हजार रुपियाँ पुरस्कार पाएकी छन्। त्यसै गरी सोलुखुम्बुकी पाशाङ ल्हामु शेर्पा सेकेण्ड रनर्सअप भएकी छन्। उनले नगद ४० हजार रुपियाँ पुरस्कार प्राप्त गरेकी छन्।

किड्स रियालीटी शोमा कालिकोटकी स्प्रीका शाही थर्ड, भक्तपुरकी जलादि खड्का फोर्थ र महोत्तरीकी श्रृयाना घिशिङ फीप्थ रनर्सअपः भए। उनीहरुलाई जनही १० हजार रुपियाँ पुरस्कार प्रदान गरिएको छ। प्रतियोगितका सबै विजेतालाई भोटिङ पार्टनर एभेनतोज कम्पनीले १० हजार रुपियाँको शैक्षिक पुरस्कारसमेत प्रदान  गरेको छ।

प्रत्येक आइतबार साँझ ६ बजे स्पेश फोके टेलिभिजन र साँझ ७ बजे ओएसआर।रियाल्टी युट्युब च्यानलबाट प्रशारण हुँदै आएको रियालीटी शो गत २०८२ बैशाखदेखि शुरु भएको थियो। भाद्रसम्म स्थानियस्तरको अडिशनमा १८ सयजना बाल–बालिकाले भाग लिएको प्रतियोगिताको मेघा अडिशनमा १ सय ८० जना छनौट गरिएको र त्यसपछि क्रमशः टप ८० तथा टप ४० हुँदै ग्राण्ड प्रिमियरमा २३ जना छनौट भएको एएनपी मिडिया हाउसका प्रवन्ध निर्देशक तथा कार्यक्रमका निर्देशक एवं परिकल्पनाकार लबबहादुर कार्कीले जानकारी गराए। कार्कीका अनुसार क्रमशः छनौट हुदै टप फाइनल ६ जनाबीच ग्रयाण्ड फिनाले भएको थियो।

लोमशबहादुर काकी र लबिस कुमार कार्कीको इभेन्ट म्यानेजमेन्ट, शम्भु प्रसाद रेग्मीको संयोजन र प्रनीमा दाहालको कार्यक्रम सञ्चालनमा सम्पन्न कार्यक्रममा ख्यातिप्राप्त अभिनेत्री मिथिला शर्माका साथमा अभिनेत्री तथा निर्मात्री नीता ढुंगाना र छमछमी नृत्य प्रतियोगिताका विजेता सरोज प्रजा निर्णायक रहेका थिए। त्यसै गरी भोटिङ राउण्डमा अभिनेता मदनकृष्ण श्रेष्ठ, अभिनेत्री तथा निर्देशक दीपाश्री निरौला, नृत्य निर्देशकहरु बसन्त श्रेष्ठ, कमल राई, राजु शाह र कबिराज घहतराज अतिथी निर्णायक रहेका थिए। 

कार्यक्रमको मुख्य प्रयाजोक वल्र्ड लिंक तथा प्रायोजकहरु नेपाल एयरलायन्स, ल्याबरोटरी स्कुल, मदरल्याण्ड सेकेण्डरी स्कुल, रितम्भरा कलेज तथा स्कुल थिए। कार्यक्रममा फेसियल हाउस मेकअप र फेमिली क्लोथ तथा स्ट्यान्डर टेलर्स क्लोथीङ पार्टनर रहेका थिए। एएनपी। मिडिया हाउसकी प्रशासन प्रमुखः अनीता तामाङले आगामी वर्ष २०८३ बैशाखदेखि नृत्यका साथै गायन रियालीटी शो नेसन्स् गट ट्यालेन्टका लागि स्थानिय स्तरबाट अडिशन गरिने जानकारी गराइन्। 

काठमाडौं – देशमा प्रतिनिधिसभा निर्वाचनको माहौल तात्दै गर्दा साङ्गीतिक क्षेत्रबाट पनि सचेतना र राष्ट्रियताको सन्देश प्रवाह गर्ने क्रम तीव्र बन्दै गएको छ। यसै सन्दर्भमा डा. ओमकृष्ण प्रसाईँको शब्द तथा स्वरमा र्‍याप शैलीको नयाँ राष्ट्रिय गीत ‘हट्छ औँसीको डार्क’ सार्वजनिक गरिएको छ।
गीतको शीर्षकले नै यसको गहिरो भाव र सन्देशलाई स्पष्ट पार्छ। यहाँ ‘औँसीको डार्क’ अर्थात् अन्धकारले समाज र राजनीतिमा व्याप्त निराशा, विकृति र अन्योलतालाई सङ्केत गरेको छ। आसन्न निर्वाचनको समयमा सार्वजनिक भएको यस गीतले अब त्यो अन्धकार हट्ने र देशमा नयाँ आशा तथा उज्यालो छाउने विश्वास व्यक्त गरेको छ।
युवा पुस्तालाई लक्षित गर्दै र्‍याप शैली अपनाइएको यस गीतले मतदानमार्फत सकारात्मक परिवर्तन सम्भव छ भन्ने सन्देश दिन खोजेको छ। ऊर्जा र चेतनाले भरिएको यस गीतको अडियो निर्माण पक्ष पनि मजबुत रहेको छ। सञ्जय हमालले बिट एरेन्ज गरेको गीतमा गोविन्द सोनीको मिक्सिङ तथा मास्टरिङ रहेको छ। सबु केसी र आर्जु चौधरीले सहायक गायनमा साथ दिएका छन् भने अनीश लिम्बुले ए लेभल स्टुडियोमा गीत रेकर्ड गरेका हुन्।
गीतको सन्देशलाई प्रभावकारी रूपमा पर्दामा उतार्न यसको म्युजिक भिडियो पनि आकर्षक बनाइएको छ। ममता रायमाझीको निर्माण तथा प्रमोद डिजीको निर्देशनमा तयार भएको भिडियोमा डा. ओमकृष्ण प्रसाईँसहित रविना श्रेष्ठ, सूर्य तामाङ, राम विष्ट, सिर्जना बस्नेत, प्रकाश खतिवडा, नायरा प्रसाईँ, अंकिता थेबे, कल्पना मगर, मन्सुल थापा र आयुषी कार्कीको अभिनय रहेको छ।
भिडियोलाई प्रशान्त केसी र उनकी टोलीले छायाङ्कन गरेका हुन् भने लक्ष्मण चौहानले सम्पादन, रङ्ग संयोजन र पोस्टर डिजाइनको जिम्मेवारी सम्हालेका छन्। सुष्मा जोशीको मेकअप, कल्पना मगरको कोरियोग्राफी र बुद्धि माझीको सहायक निर्देशन रहेको यस भिडियोले गीतको भावलाई जीवन्त बनाएको छ।
निर्वाचनको छेकोमा सार्वजनिक भएको यो साङ्गीतिक कोसेलीले आम मतदातालाई सचेत गराउँदै देशको अन्धकार हटाएर उज्यालो भविष्य निर्माण गर्न प्रेरित गर्ने विश्वास निर्माण पक्षले लिएको छ।

काठमाण्डौ- सेलिब्रेटी नेपाल प्रतिष्ठानको आयोजनामा ‘विराट फिल्म एन्ड म्युजिक अवार्ड’ को चौथो संस्करण भव्य रूपमा सम्पन्न भएको छ। काठमाडौँस्थित चलचित्र विकास बोर्डको हलमा आयोजित ‘चौथो विराट फिल्म एन्ड म्युजिक अवार्ड–२०८२’ कार्यक्रममा नेपाली चलचित्र तथा गीत–संगीत क्षेत्रका स्रष्टाहरूलाई विभिन्न विधामा सम्मान तथा अवार्ड प्रदान गरिएको हो।

संस्कृति, पर्यटन तथा नागरिक उड्डयन मन्त्री अनिलकुमार सिन्हाको प्रमुख आतिथ्यता तथा बोर्डका अध्यक्ष दिनेश डिसीको विशेष आतिथ्यतामा सम्पन्न कार्यक्रममा चलचित्र र संगीत गरी कुल ३६ विधामा अवार्ड वितरण गरिएको थियो। यसमध्ये २४ विधा संगीततर्फ र १२ विधा चलचित्रतर्फ समावेश गरिएको आयोजकले जनाएको छ। कार्यक्रममा चलचित्र विकास बोर्डको सहकार्य रहेको थियो भने २०८१ सालमा प्रदर्शन भएका फिल्म तथा सार्वजनिक गीत–संगीतलाई प्रतिस्पर्धामा समेटिएको थियो।

लाइफटाइम अचिभमेन्टदेखि पत्रकारिता पुरस्कारसम्म

प्रतिष्ठानका अध्यक्ष रघुनाथ सापकोटाको अध्यक्षतामा सम्पन्न कार्यक्रममा निर्देशक शुभाष गजुरेललाई ‘लाइफ टाइम अचिभमेन्ट अवार्ड’ सहित नगद रु. २५,५५५ प्रदान गरियो। पत्रकार श्री कृष्ण भट्टराईलाई नगद रु. ११,१११ सहित पत्रकारिता पुरस्कार प्रदान गरिएको थियो। कार्यक्रममा लेखक तथा निर्देशक काजी लिम्बु, कलाकार श्रेया दुलाल, निर्माता सुनीता सापकोटा, राम नारायण उपाध्याय र बिज्ञान श्रेष्ठलाई विशेष सम्मान गरिएको थियो।

जुरी टिममा निर्देशक तथा सम्पादक रक्षा सिंह राणा, छायाँकार शिव ढकाल, गीतकार प्रमोद ढुंगाना, निर्देशक ऋषि लामिछाने, लेखक तथा निर्देशक अमरदीप सापकोटा तथा गायक नविन कुमार पौडेल रहेका थिए।

चलचित्रतर्फका प्रमुख विजेताहरु:

• उत्कृष्ट फिल्म: सतीदेवी

• उत्कृष्ट निर्देशक: मिलन चाम्स (अञ्जिला)

• उत्कृष्ट अभिनेता: विजय वराल (पूर्ण बहादुरको सारंगी)

• उत्कृष्ट अभिनेत्री: केकी अधिकारी (बोक्सीको घर)

• उत्कृष्ट सह–अभिनेत्री: श्रृजना अधिकारी (सतीदेवी)

• उत्कृष्ट सह–अभिनेता: कामेश्वर चौरसिया (फेरी रेशम फिलिली)

• उत्कृष्ट छायाँकार: पुरुषोत्तम प्रधान (पिताम्बर)

• उत्कृष्ट सम्पादक: सन्देश शाह (ज्वाईं साव)

• उत्कृष्ट संगीतकार: आशिष अविरल (पूर्ण बहादुरको सारंगी)

• उत्कृष्ट पटकथा संवाद: लक्ष्मण सुवेदी (सतीदेवी)

• उत्कृष्ट रंग संयोजन: राजेन्द्र मोक्तान (अञ्जिला)

• उत्कृष्ट इन्करेज्मेन्ट अवार्ड: बाल कलाकार मंजिला बानियाँ र हर्षिका ओली (सतीदेवी)

संगीत तर्फका उत्कृष्ट विजेताहरु:

• उत्कृष्ट गायक (आधुनिक): रुद्र शेखर शर्मा (के छ सान्नानी)

• उत्कृष्ट गायिका (आधुनिक): अञ्जु पन्त (थाहै थिएन दिल)

• उत्कृष्ट संगीतकार: मनोज चौलागाईं

• उत्कृष्ट गीतकार (आधुनिक): प्रतिमा गुरुङ (न जिउन सकें न मर्न सकें)

• पब्लिक च्वाइस अवार्ड: ईश्वर वल्लभ उप्रेती (आदत बन्यौ)

• उत्कृष्ट म्युजिक भिडियो निर्देशक: राजेन्द्र बस्नेत (मेरो घरको मुन्तिर)

• उत्कृष्ट छायाँकार (म्युजिक भिडियो): मदन काश्यप घिमिरे (अजम्बरी माया)

• उत्कृष्ट गायक (लोक पप): दिनेश भारती (चन्द्र कुमारी)

• उत्कृष्ट गायक (लोक): चन्द्र लामा (मुटुमा बसेकी माया)

• उत्कृष्ट गीतकार (गजल): तुलाराम लामिछाने (समय खराव छ)

• उत्कृष्ट निर्देशक (भाषाभाषी चलचित्र): दिनेश लिङ्ग्देन (दुस्प्रयास)

• उत्कृष्ट अभिनेता (भाषाभाषी चलचित्र ‘तलास’): राजकुमार लिङ्ग्देन

कला क्षेत्रलाई उत्साह

नेपाली चलचित्र तथा गीत–संगीत क्षेत्रमा क्रियाशील स्रष्टाहरूलाई प्रोत्साहन, सम्मान र पहिचान दिलाउने उद्देश्यले आयोजना हुँदै आएको ‘विराट फिल्म एन्ड म्युजिक अवार्ड’ ले यस वर्ष पनि कला क्षेत्रलाई थप ऊर्जा प्रदान गरेको आयोजकले जनाएको छ।

कार्यक्रममा कलाकार, निर्देशक, निर्माता, पत्रकार तथा संगीतकर्मीहरूको उल्लेख्य उपस्थिति रहेको थियो। चौथो संस्करण सफलतापूर्वक सम्पन्न भएसँगै आगामी वर्ष अझ व्यापक र समावेशी रूपमा आयोजना गर्ने तयारीसमेत सुरु गरिएको आयोजकले जानकारी दिएको छ।

काठमाण्डौ- चलचित्र विकास बोर्डद्वारा स्थापना गरिएको चलचित्र संग्राहलयको मंगलबार औपचारिक शुभारम्भ गरिएको छ। लक्ष्मी कुमारी बस्नेतले एक विशेष समारोहका बीच संग्राहलयको उद्घाटन गरेकी हुन्। नेपाली चलचित्रको ऐतिहास झल्कने सामग्रीहरु राखिने संग्राहलय चलचित्र विकास बोर्डले सञ्चालनमा ल्याएको हो ।

बोर्डको प्रेक्षालयमा सम्पन्न कार्यक्रममा चलचित्रकर्मी, स्रष्टा तथा विभिन्न संस्थाहरूले नेपाली चलचित्रको इतिहास झल्कने महत्वपूर्ण सामग्रीहरू हस्तान्तरण गरेका थिए। ऐतिहासिक क्यामेरा, क्यासेट, टेप, पोस्टर, आर्टवर्क, स्क्रिप्ट तथा संग्रहयोग्य कागजातहरू सचिव बस्नेतलाई औपचारिक रूपमा बुझाइएको थियो। सोही अवसरमा बोर्डका तर्फबाट सामग्री उपलब्ध गराउने व्यक्तित्व तथा संस्थाहरूलाई सम्मान पनि गरिएको थियो।

संग्राहलय नेपाली चलचित्रको इतिहास, कला र प्रविधिलाई भावी पुस्तासम्म सुरक्षित रूपमा हस्तान्तरण गर्ने उद्देश्यले सञ्चालनमा ल्याइएको बोर्डले जनाएको छ। कार्यक्रममा बोर्डका अध्यक्ष दिनेश डिसीले स्वदेशी चलचित्र सङ्ग्रहालय स्थापना आफ्नो दीर्घकालीन सपना रहेको उल्लेख गरे। उनले यसलाई नेपाली चलचित्रको आत्मा जोगाउने अभियानका रूपमा व्याख्या गर्दै भने,

“नेपाली चलचित्रको इतिहास केवल सम्झनामा सीमित नहोस्, त्यसलाई पुस्तान्तरण गर्न सकिने गरी संस्थागत रूपमा संरक्षण गर्नुपर्छ भन्ने सोचका साथ हामीले यो पहल गरेका हौँ।”

अध्यक्ष डिसीले विगतका संघर्ष, प्रविधिगत विकास र सिर्जनात्मक यात्रालाई एकै थलोमा अभिलेखीकरण गर्नु समयको माग भएको धारणा व्यक्त गरे। साथै, आगामी दिनमा सङ्ग्रहालयलाई डिजिटल अभिलेखीकरणसँग जोड्दै अनुसन्धानकर्ता, विद्यार्थी तथा चलचित्रप्रेमीका लागि अध्ययन केन्द्रका रूपमा विकास गर्ने लक्ष्य रहेको जानकारी दिए।
“यो सुरुआत मात्र हो। हामी यसलाई राष्ट्रिय गौरवको परियोजनाका रूपमा विस्तार गर्नेछौँ,” उनले प्रतिबद्धता जनाए।

बोर्डले भविष्यमा चलचित्रकर्मी, विभिन्न संस्थाहरू तथा निजी संग्राहकहरूसँग सहकार्य गर्दै संग्राहलयलाई थप व्यवस्थित र समृद्ध बनाउने योजना रहेको जनाएको छ। नेपाली चलचित्र उद्योगको समग्र इतिहासलाई एकै स्थानमा संरक्षण गर्ने यो पहलले चलचित्र क्षेत्रलाई नयाँ आयाम दिने विश्वास गरिएको छ।

काठमाडौं – चलचित्र विकास बोर्ड ले मातृभाषी तथा आदिवासी जनजाति चलचित्र प्रवर्द्धनलाई प्राथमिकतामा राख्दै विभिन्न जातीय चलचित्रसँग सम्बन्धित संघ–संस्थासँग सहकार्य अघि बढाएको छ। नेपाल सरकार, सञ्चार तथा सूचना प्रविधि मन्त्रालय अन्तर्गतको बोर्डले आदिवासी जनजाति तथा मातृभाषी चलचित्र प्रवर्द्धन समितिको सिफारिसका आधारमा उक्त निर्णय गरेको जनाएको छ।

बोर्डका अनुसार मातृभाषी र आदिवासी जनजाति चलचित्रको संरक्षण, संवर्द्धन तथा प्राविधिक क्षमता अभिवृद्धि गर्ने उद्देश्यले रु. ४१ लाख ९५ हजार बजेट स्वीकृत गरिएको छ। सो रकम विविध तालिम, कार्यशाला तथा चलचित्र महोत्सव सञ्चालनमा खर्च गरिने जानकारी दिइएको छ।

उक्त सम्झौताअनुसार निर्देशन तालिम, सिनेमाटोग्राफी प्रशिक्षण, कथा लेखन तथा निर्देशन कार्यशाला, अभिनय तथा छायांकन तालिम, सांस्कृतिक संरक्षणसम्बन्धी प्रशिक्षण तथा आदिवासी जनजाति चलचित्र महोत्सव आयोजना गरिनेछ। यी कार्यक्रम देशका विभिन्न जातीय समुदायमा सक्रिय चलचित्रकर्मीलाई लक्षित गरी सञ्चालन गरिने बोर्डले जनाएको छ।

बोर्डका अध्यक्ष दिनेश डिसी ले यस पहललाई समावेशी चलचित्र उद्योग निर्माणतर्फको महत्वपूर्ण उपलब्धि बताउनुभयो। उहाँले भन्नुभयो, “नेपाल बहुभाषिक र बहुसांस्कृतिक देश हो। चलचित्र क्षेत्रले पनि यही विविधतालाई समेट्न आवश्यक छ। मातृभाषी तथा आदिवासी जनजाति चलचित्र प्रवर्द्धन गर्नु हाम्रो सांस्कृतिक जिम्मेवारी मात्र नभई राष्ट्रिय पहिचान जोगाउने अभियान पनि हो।”

यस कार्यक्रमले स्थानीय भाषा र संस्कृतिमा आधारित मौलिक कथाको दस्तावेजीकरणमा टेवा पुर्‍याउनेछ। साथै, नयाँ पुस्ताका चलचित्रकर्मीलाई सीप र दक्षतामा सशक्त बनाउँदै व्यावसायिक रूपमा अघि बढ्न सहयोग पुग्ने अपेक्षा बोर्डले गरेको  छ।

चलचित्र क्षेत्रमा सक्रिय विभिन्न जातीय संस्थाहरूले बोर्डको कदमलाई स्वागत गर्दै मातृभाषी चलचित्र निर्माणमा नयाँ ऊर्जा, अवसर र अन्तर्राष्ट्रिय पहिचान विस्तार हुने विश्वास व्यक्त गरेका छन्।

काठमाडौं – पूर्वको रमणीय जिल्ला इलाममा आधुनिक सिनेमा हलको अभाव अन्त्य गर्दै फ्रेन्ड्स सिनेमाजले आफ्नो नयाँ शाखा सञ्चालनमा ल्याएको छ। धरान र बुटवलमा सफल सञ्चालनपछि चेनको तेस्रो आउटलेटका रूपमा इलाम नगरपालिका–७ मा हल सुरु गरिएको हो।

शुक्रबार आयोजित उद्घाटन समारोह विशेष आकर्षणको केन्द्र बन्यो। कार्यक्रममा अभिनेता पल शाह, अभिनेत्री उषा उप्रेती तथा द्वन्द्व निर्देशक एवं निर्माता चन्द्र पन्तको उपस्थिति रहेको थियो। आफ्ना मनपर्ने कलाकारलाई नजिकबाट भेट्न पाउँदा स्थानीय दर्शक उत्साहित देखिन्थे। हल परिसर दर्शकको बाक्लो उपस्थितिले उत्सवमय बनेको थियो।  करिब ३ करोड ५० लाख रुपैयाँको लगानीमा निर्माण गरिएको यस हलमा १८८ सिट क्षमता रहेको छ। नगरपालिकाको बहुतले पार्किङ भवनमा सञ्चालनमा आएको हलमा अत्याधुनिक ‘टुके प्रोजेक्सन’ र ‘डल्बी डिजिटल साउन्ड सिस्टम’ जडान गरिएको छ। यसले राजधानीका मल्टिप्लेक्ससरह ध्वनि र दृश्य अनुभव दिने सञ्चालकहरूको दाबी छ।

फ्रेन्ड्स सिनेमाजका अध्यक्ष प्रदीप धामीले मोफसलका दर्शकलाई राजधानीस्तरको सुविधा उपलब्ध गराउने लक्ष्य रहेको बताए। “अब इलामका दर्शकले गुणस्तरीय फिल्म हेर्नका लागि अन्य सहर धाउनुपर्ने बाध्यता रहने छैन,” उनले उल्लेख गरे।

सञ्चालकहरू प्रदीप धामी, पुष्कर घिमिरे र आशिष एच तामाङका अनुसार पारिवारिक वातावरण, आरामदायी सिट र आधुनिक प्रविधिलाई प्राथमिकता दिँदै हल सञ्चालनमा ल्याइएको हो। निर्देशक आशिष एच तामाङले नेपाली चलचित्रको बजार विस्तारका लागि जिल्ला–जिल्लामा साना तर सुविधासम्पन्न हल आवश्यक रहेको धारणा राखे। उनका अनुसार घरेलु बजार सुदृढ बनाउन मोफसलमै पूर्वाधार विस्तार अपरिहार्य छ।

इलाममा स्तरीय सिनेमा हल नहुँदा नयाँ चलचित्र प्रदर्शनमा ढिलाइ हुने अवस्था थियो। अब भने देशभर रिलिज भएकै दिन नयाँ नेपाली फिल्म इलाममा पनि प्रदर्शन हुनेछन्। यसले स्थानीय बासिन्दासँगै पर्यटकलाई समेत मनोरञ्जनको नयाँ विकल्प उपलब्ध गराएको छ।  फ्रेन्ड्स सिनेमाजले आगामी दिनमा अन्य सहरहरूमा पनि आफ्नो चेन विस्तार गर्ने योजना अघि बढाएको जनाएको छ।